ꉡꌋꆀꉠꆀꉙ
ꁱꊿ:ꐚꑕꒈꎆ
ꀘꊿ:ꐙꇐꑸꆀ
ꉡꌋꆀꉠꆀꉙ，ꊼꇅꑌꐮꐞꀋꋻ！
ꀄꊭꄮꇬ，ꀉꄉꆀꉙꌌꄉꁮꅉꅺꊈꌧ，ꃅꃴꃅꄅꈍꃅꁉ，ꃄꄻꊂꄻꈍꃅꄻ，ꈨꁻꆪꁻꈍꃅꁻ，ꀿꃼꀿꎹꈍꃅꎹꌠꌧꇁꉢꂘꃅ；ꀉꂿꆀꉙꌌꄉꑘꀕꉙꅉꃅ，ꀉꂿꅩꌺꐥꐨꐥꄸꉙ，ꀉꑳꀉꎓꉂꏣꉂꑟꉙꇁꉢꇰꃅ。ꁡꇤꃰꊿꑮꒃꋑꋉ、ꁍꁈꁧꄻꅀ，ꃆꉉꑘꉉ、ꈫꅐꏦꈿꄿꂿꅉꀕꆀꉙꌌꄉꉂꅇꑟꅅꄜ、ꅉꀕꆀꉙꌌꄉꌧꈿꁉꈿꇬꎷ。ꑠꐛꅹ，ꉡꆹꆀꉙꌌꄉꑍꐎꅝꃅꅝ，ꆀꉙꌌꄉꃆꄔꇬꃅꇬ，ꆀꉙꌌꄉꃅꇴꌧꃅꌧꅷꊿꒆꊿꐚ。ꀉꒉꈭꐨ，ꉡꊈꒆꑌꆊꄃ，ꐧꒆꑌꌧꋬ，ꌧꋬꉪꑳꀐ，ꀅꌳꀅꌳꃅꄯꒉꀊꐎꀕ，ꂷꋶꀊꆈꀕꌠꈐꄉꆀꉙꐩꋊ、ꆀꉙꁮꅉ、ꆀꉙꃆꂮꌧꇐꂿꇐꉢꌷꉢꅲ、ꉢꎺꉢꁱꄉ，ꆀꉙꈫꄉꎧꏸꑱꃅꑱ。ꆀꉙꉂꏣꈜꀕꅼ，ꉂꑟꈜꀕꎴꌠꉢꅉꐚ。ꋍꈭꐨꆈꌠꁱꂷꉢꌌꉂꏣꎹꅉꃅꄉꁱꇐꁱꈩ、ꁱꇐꁱꄻ，ꉢꎼꁱꇐꈝꃀꇬꄉꌥꉩ，ꁱꇐꁱꌠꉪꐨꆹꉠꉌꂵꇬꄉꐴꅑꅿ、ꊧꅑꃨꇈꂷꅑꀮꇗꀕ，ꑠꃅꄉꊌꐨꐛꂨꀕ，ꉂꏣꄚꐊꐛꂨꀕ，ꉂꅇꋍꎴꇈꋍꎴꄹꉢꄜ《ꆃꎭꉜꇐꁱꀕ》、《ꆃꎭꑍꄜ》ꌋꆀ《ꊿꋅ》ꇰ，ꉢꄜꆀꃅꇖꈋ、ꁧꇁꇉꄩꈁꄽꁊ。ꆀꉙꅇꉉꉏꉈꐯꋑꄮꇬ，ꈁꁠꋍꁬꇈꋍꁬꄹꑌꈁꄽꉢꄌꊌ，ꆀꉙꌌꄉꊥꇺꅷꃅꇖꄹꊂꑟꄮꇬꉠꊂꀮꅇꑌꉐꐛꃅꑌꐛꋻ，ꆀꉙꂘꃀꂷꉬꄷꌶꌺꋍꏅꂘꄮꉹꁌꉠꏯꇇꃀꑌꄖꋻ。
ꉢꈁꊌꌠꈲꐪ、ꂓꌗ、ꀑꑊꉬꇮꆀꉙꄷꉢꁴꌠ，ꉌꐡ、ꉌꇿ、ꉌꌒ、ꀑꑊꐚꒉꅿꌠꉬꇮꆀꉙꌞꌋꉢꁴꌐꌠ，ꑭꐨꌋꆀꈝꃀꑍꋮꁬꃨ，ꀉꁁꆏꇇꁮꉬꇮꆀꉙꌞꉢꁴꌐꌠ。ꑠꐛꅹ，ꉢꐥꍂꃅꆀꌺꈀꒉꈀꆹꅉꏭꆀꅇꄜꌠꆏꇬꉛꒉꇬꎷ，ꃶꐚꃅꇬꑌꈁꒉꅉꑊꊌ，ꈁꉉꅉꇬꇐꑌꌋꉆꄡꑟꌠ。ꆀꉙꑆꊋꃅꇬꆹꀿꃀꑆꊋꌡ，ꉌꂵꂷꇬꑌꂷ，ꈫꏣꑳꏣꏢꇬꐂ，ꇬꇉꌦꅪꄅꍻꀕꂷꉬꑲꆏ，ꀿꃀꑆꊋꀋꎺꉆꑴꅀ，ꆀꉙꑆꊋꀋꌣꉆꑴꅀ。ꑠꐛꅹ，ꁮꅐꁮꐚ、ꈢꈐꈢꉈꇿꏹꄿꂿ，ꀿꅇꎸꇺꋯ、ꃀꅇꂷꋶꒉꌠꉢꌌꀨꇬꄉ，ꐭꌶꅉꄉꅑꒉꌶꅉꇬꑟꌠ，ꋍꈭꊰꌕꈎꄮꅑꑍꈭꑍꊎꉬꄮ，ꃅꈋꑟꈚꐥ，ꌤꆿꑟꑵꋒꄿꂿ，ꆀꉙꑲꆀꈨꑭꆧꑭꌡꃅꉠꉌꂵꏭꁨꄏ，ꆀꉙꑲꆀꑵꌋꉉꌋꉠꉌꂵꏭꃹꄏ，ꆀꉙꑲꆀꁦꀑꎺꒉ、ꇉꅶꂷꒉꋍꍔꌡꄉꈍꄮꅝꑌꌤꁮꃹ。
ꉡꌋꆀꉠꆀꉙ，ꊼꇅꑌꐮꐞꀋꉆ。
ꈻꄹꉈꆀꉙꆹꈨꑭꌟꃅꏁꌬꀕꄉꉌꃀꊷꆣꀕ，ꊸꄹꉈꆀꉙꆹꑋꆳꌟꃅꈺꌋꀕꄉꇭꀧꁦꉘꀕ。ꌩꃨꈍꑋꃨꇈꌩꏾꈍꑋꊰ，ꃅꆳꈍꃅꁏꇈꂷꉐꈍꃅꐛ，ꋧꃅꈍꃅꐈꇈꃰꊿꈍꃅꋓꄿꂿ，ꆀꉙꉂꇬꉂꀋꑽꉂꀋꋒ，ꆀꉙꈝꃀꍬꇬꍬꀋꑽꍬꀋꋒ。ꆀꉙꆹꋧꃅꇣꄧꅇꉙꈫꇬꀉꆹꐯꀉꆹꀐꌠ，ꀉꁌꀋꁨ，ꀉꄙꊰꉐꈎꃅꆀꉙꌌꄉꉂꅇꄜ，ꁍꍸꌺꁵ、ꀿꍸꇖꁵ，ꋍꋏꍸꇈꋍꋏꊛ，ꋍꋏꍸꇈꋍꋏꌬ。ꀋꄸꄷ，ꉢꆀꉙꀋꉉꑲꆏ，ꉠꒌꉠꆠꉢꀋꐊꌠꌡ，ꉠꑭꉠꇇꉢꀋꅑꌠꌡ，ꉠꉌꉢꀋꌅ，ꉠꈯꉢꀋꐕ，ꉠꊋꉢꀋꑌ。ꉡꌋꆀꉠꆀꉙꆹ，ꌩꁧꌋꆀꌩꐴꌠ，ꌩꐴꀋꉬꌩꁧꋦꀋꄐ；ꉡꌋꆀꉠꆀꉙꆹ，ꒈꒉꌋꆀꉜꏂꌡ，ꒈꒉꀋꉬꉜꏂꇿꆗꂯ；ꉡꌋꆀꉠꆀꉙꆹ，ꌩꏪꌋꆀꐔꇌꌡ，ꌩꏪꀋꉬꐔꇌꇿꀜꂯ；ꉡꌋꆀꉠꆀꉙꆹ，ꋛꂷꌋꆀꋚꇖꌡ，ꋛꂷꀋꉬꋚꇖꇿꁖꇁ。ꈍꑋꃢ，ꉢꆀꉙꌌꉂꏣꄜꅉꃅꄉꊨꏦꀱꊨꏦꉌꐡ；ꈍꑋꃢ，ꉢꆀꉙꐛꅹꌋꐓꀄꂼꂻꐛꇁꄉꑓꁴꀑꈑꇉ；ꈍꑋꃢ，ꉠꈭꉠꇍꆀꌺꆀꉙꀋꉉꏦ、ꆀꉙꀋꐭꐒ；ꈍꑋꃢ，ꆀꌺꆀꅪꆀꅇꀋꌧꃅꄉꏣꄜꑟꄜꑽ、ꋊꎭꃤꎭꑽꌠꏦ，ꈭꑽꈜꑽ、ꉪꑽꏢꑽꁧꌠꐒ。ꃆꏂꊂꑋꐈꇁꃅꇴꃴꑐꀕꁘꐛꄉꀿꐊꎭꁻ，ꃀꐊꑱꍹꁧꄹꉈ，ꄙꇁꉐꈎ，ꀑꁮꅺꐳ、ꌳꃈꌳꈄꌠꁍꁈꍸꇐ，ꈍꑋꈎ、ꈍꑋꋏꀉꄂꃅꉪꄝꋊꈘꄉꈍꃅꁍꁈꂿꁧꂰꌠꐒ，ꀎꋏꀉꁌꀋꁨꌋꆀꊂꋊꌺꇖꂿꈴꀋꄿꌠꏦ。
ꆀꉙꉉꑲꆀꉡꆹꇿꄉꇁ、ꇿꇬꁧꂯꌠꉢꅉꐙ。ꆀꉙꉉꑲꆀꀉꁌꑳꇤꏡꌠꀋꑍꀋꈤ、ꀉꄉꃭꇁꈫꌠꀋꁮꀋꑍ。ꆀꉙꆹꃰꐻꉈꐻ、ꃅꆳꂷꉐꄙꇁꉐꃅꋑꋻꀐ，ꋋꆹꉪꊇꐴꀕ，ꐴꅑꑳꆀꁧꒉ，ꁧꒉꑲꆀꂷꅑ。ꉪꊇꆹꆀꉙꂴꊪꊂꊛ、ꆏꉙꉢꂘ、ꆏꄜꉢꇰꃅ，ꆏꐂꉠꃀꅝ、ꆏꏮꉢꉛꃅ、ꆏꋮꉠꈌꊐꄡꑟ。ꆀꉙꆹꉠꀑꇬ、ꉠꐥꐨꇬꈫꁁꉬꀐ，ꉢꆀꉙꐛꅹꑓꁴꌦꅪꐊꑌꀋꏦ，ꉢꆀꉙꐛꅹꉌꃀꌦꆈꇓꑌꀋꐒ。ꆀꉙꒈꌺꋋꏢꈍꃅꑌꐈꌊꆀꉙꒊꃀꋍꂡꐛ，ꋍꊋꋌꑌ、ꋍꇷꋌꄙ、ꋍꒌꋍꋌꐊ，ꋍꂓꋍꑫꋌꎺꌠꆀꉙꒊꃀꋍꂡꐛꎁꎂ，ꆀꉙꈝꃀꈴꅉꐯꅉꑟ，ꈴꅉꎵꑳꀕꇈꁤꇅꀕꎁꎂ，ꆀꉙꃧꃨꉓꁱꅩꍅꄑꎁꎂ，ꆀꉙꇤꈏ，ꈍꄮꇈꈍꄮꑌꊷꆣꀕꇈꁨꐞꄑꎁꎂ！
